親愛的

女麻女麻：

原來已經九年了。

我要數手指才算得出你走了多久。也不知道這是因為我常常想著你，還是因為我沒有想起你，可能是各有一點吧。人間多事，我諗你會原諒我掛。

我很忙，也喜歡我忙著的事。你成日提我黃大仙要我勤力，我好勤力架喇，好多時一個禮拜做足七日，去教書，教話劇。係呀，我而家為人師表，讀書都讀到碩士喇，算係咁。

近幾年都好忙，除左忙工作......我不懂得怎樣解釋其他事，有一點關社會事、有一點政治、又有一點關於將來。可能因為我做教育，有時，我望住豆丁咁細既幼稚園學生、小學生、中學生，不期然會有種使命感，到底我要教佢乜野，留一個乜野社會俾佢地。

以前你成日同我講，為左避開共產黨先走落來，而家回歸唔知走去邊，要搵窿捐。而家電視日日播國歌，新聞都唔係咁信得過，你以前睇緊果兩個台，而家其實得返一個。本來有個新既，個政府又話唔俾佢做生意，仲要話無解喎。我都好少睇電視，新聞多數係打電腦同上網睇。不過，食飯時間都好少睇新聞，一來我已經唔再返屋企食飯，二來個屋企好似好生保。

有個新朋友話，唔知點解我成日都無精神，我都唔知。可能係因為香港都無乜精神。個社會好多人好慘，住住下條村，話拆就拆；ｄ野食越來越貴，雙蛋公仔麵加杯野飲都收成36蚊，你嫌貴既話仲會有人同你講「俾心機搵錢」，都唔知咩道理。

我已經好少同阿爸阿媽傾計。我都發覺我成日呻佢地唔明白我。有個朋友話，其實係因為我緊張佢地先會呻。諗落都係，以前爸爸成日教我咩係公義，要關心個社會，但係最近睇新聞佢同我講屋企唔可以講政治。你成日叫我唔好學老豆，如果唔係出街會俾人打。但係我唔聽，我硬頸，而家反而俾佢話返轉頭。

我身邊有好多朋友，佢地好傻，會為左香港做好多野。我本來都覺得佢地傻傻地，但係有ｄ野，如果唔做，就真係無人做，個社會會越來越差，有錢有權就大哂，無乜底線，修橋補路無屍駭，但係人死左都要執骨掛、有時，我同佢地一齊去執骨，去救命，其他人都無咩反應，我都搞唔清係我地傻定其他人顛。

我好忙，亦都好累。身邊有心的朋友都覺得好累......我唔明，到底人一世，其實有咩值得去做？我諗唔通......

呀，仲有，我識左個女仔，佢好好人，我仲跟左佢食齋同信彿，個人係少左脾氣，係好事。不過，我諗我唔係幾識得去愛人，所以我地最終無一齊。上兩個月，香港有學生示威，警察竟然出催淚彈......其實我都在場，吸左些少煙，不過我哮喘已經好返，唔洗擔心。當時兵荒馬亂，我走緊既時候，就係留左幾隻字俾呢個女仔，危急關頭我諗起佢。香港好少人關心人，政府都唔係好關心人，搞到我地一係嬲得滯，一係傷心得滯，好似無咩值得開心，日日都話你聽香港好差，你又要點樣迎合個社會同大陸......總之就係日日同你講做人要搾頸就命。

女麻女麻，我唔知道時間係點樣過。我記得你話過，舅公好支持共產黨，你地兩姐弟點樣一路嘈交一路食飯。其實我都想學，不過今時今日，食齋、講政治、同人地唔同，好似已經好大罪，無乜人會再係咁做。

呢段日子，我大個左好多，雖然辛苦，但係我諗遲早都要識，所以我唔怕。你七十幾歲都夠膽戒煙，成日話死咪死囉，我以前以為人應該求生，唔好死死聲，而家先知你當時其實係唔怕死。

我而家都唔怕死。我大個喇。

永遠給你吃酸橙等你叫「好孫」的君彥上